Облыс әкімі баспасөз қызметінің мәлімдеуінше, екі тарап бүгінде жүзеге асырылып жатқан жобалар мен өзара ынтымақтастықтың келешегін талқылады.

Әбілқайыр Сқақов өңірде Оңтүстік Кореяның жоғары технологиялар мен ғылым саласындағы тәжірибесін зерделеуге мүдделі екендігін атап өтті.

- Павлодар облысының ресурстарын өсім нүктелерін құру әлеуеті ретінде қолдануға болады, - деді Әбілқайыр Сқақов. – Инвестицияларды тарту - біз үшін бірінші кезектегі мәселе. Ол үшін бізде қажетті инфрақұрылым мен басқару институттары бар. Қаржыландыру секторлары да жетерлік.

Төтенше және Өкілетті елші оңтүстік кореялық компаниялар үшін өнеркәсібі дамыған Павлодар облысымен жұмыс істеу аса қолайлы екендігін жеткізді. Сонымен қатар, Ким Дэ-сик ферросилиций өндіретін зауыттың құрылысымен айналысатын қазақстандық «Mineral Product» ЖШС мен Оңтүстік Кореяның Sac Holding компаниясының бірлескен жобасы туралы еске салды. Қазір бұл жоба бойынша техникалық-экономикалық негіздеме әзірленіп жатыр.

- Өткен жылы бастаған әріптестігіміз жалғасын тапса дейміз, - деді елші. – Біздің компанияларымыз агроөнеркәсіптік кешен саласында әрекеттесуге дайын. Қазіргі кезде «ақылды фермерлік» бағыты жақсы дамыған. Осы бағытта жұмыс істеуге болады. Мен Павлодар облысының мүмкіндіктері мен ерекшеліктерін тізбелеп жазып алып, олар туралы міндетті түрде оңтүстік кореялық компаниялардың өкілдеріне хабарлайтын боламын.

Тараптар медицина мен білім беру саласындағы әріптестік мәселелерін де талқылады. Әбілқайыр Сқақов Оңтүстік Корея мамандарының осы салалардағы бай тәжірибесін Павлодар облысында қолдануға болатынын атап өтті.

Фото: Валерий Бугаев

pavlodarnews.kz

Тэги: Павлодар облысының әкімі, Әбілқайыр Сқақов, елші, Оңтүстік Корея